مغربی بنگال انتخابی نتائج LIVE: رجحانات میں بی جے پی نے اکثریت حاصل کی، ممتا پر وداعی کا خوف!
رجحانات میں بی جے پی نے اکثریت حاصل کی
مغربی بنگال میں حکومت سازی کے لیے 148 سیٹوں کی ضرورت ہوتی ہے، اور کچھ میڈیا رپورٹس میں بی جے پی کو رجحانات میں 152 سیٹوں پر سبقت حاصل کرتے ہوئے دکھایا جا رہا ہے۔ یعنی رجحانات میں بی جے پی نے اکثریت حاصل کر لی ہے۔ اس کے ساتھ ہی ممتا بنرجی پر وداعی کا خوف طاری ہونا لازمی ہے، کیونکہ ان کے امیدواروں کو مستقل سخت مقابلے کا سامنا کرنا پڑ رہا ہے۔ اب تک 263 سیٹوں کے رجحانات سامنے آئے ہیں، جن میں سے 152 سیٹوں پر بی جے پی امیدوار اور 104 سیٹوں پر ٹی ایم سی امیدوار آگے چل رہے ہیں۔ بقیہ سیٹوں پر کانگریس، بایاں محاذ اور دیگر پارٹیوں کے امیدوار آگے چل رہے ہیں۔
ترنمول کانگریس اور بی جے پی میں زوردار ٹکر
مغربی بنگال میں 293 اسمبلی سیٹوں میں سے 248 سیٹوں کے رجحانات سامنے آ گئے ہیں۔ بی جے پی نے حیران کرتے ہوئے ترنمول کانگریس پر سبقت حاصل کر لی ہے، حالانکہ کئی مقامات پر ووٹوں کا فاصلہ بہت کم ہے۔ ابھی تک جو رجحانات سامنے آئے ہیں، اس کے مطابق 140 سیٹوں پر بی جے پی امیدوار آگے چل رہے ہیں۔ ترنمول کانگریس کے 102 امیدوار آگے چل رہے ہیں، جبکہ دیگر پارٹیوں کی کارکردگی انتہائی مایوس کن ہے۔ کانگریس کے محض 2 امیدوار آگے چل رہے ہیں، جبکہ بایاں محاذ کا ایک امیدوار سبقت بنائے ہوئے ہے۔ بقیہ 3 سیٹوں پر دیگر امیدواروں نے سبقت بنا رکھی ہے۔
ممتا بنرجی کی بھوانی پور سیٹ پر سوویندو نے بنائی ابتدائی سبقت
پوسٹل بیلیٹ کی گنتی میں کئی سیٹوں پر بی جے پی آگے چل رہی ہیں، ان میں وزیر اعلیٰ ممتا بنرجی کی بھوانی پور سیٹ بھی شامل ہے۔ اس سیٹ پر بی جے پی کی طرف سے سوویندو ادھیکاری انتخابی میدان میں ہیں اور انھوں نے ممتا بنرجی پر ابتدائی سبقت بنا لی ہے۔ حالانکہ یہ بہت شروعات رجحانات ہیں، اور ابھی تو الیکٹرانک ووٹنگ مشینیں بھی نہیں کھولی گئی ہیں۔
مغربی بنگال میں 294 میں سے 293 اسمبلی سیٹوں کے لیے ووٹ شماری شروع
مغربی بنگال اسمبلی انتخابات کے نتائج آج سامنے آ جائیں گے۔ حالانکہ 294 اسمبلی سیٹوں میں سے 293 سیٹوں پر ہی آج ووٹ شماری ہوگی، کیونکہ پھالٹا سیٹ پر پھر سے ووٹنگ ہونی ہے۔ پھالٹا کو چھوڑ کر بقیہ سبھی سیٹوں پر ووٹ شماری 8 بجے سے شروع ہو گئی ہے۔ 8 بجے پوسٹل بیلیٹ کی گنتی شروع ہوگی، اس پھر اس کے تقریباً نصف گھنٹے بعد الیکٹرانک ووٹنگ مشین، یعنی ای وی ایم کی ووٹ شماری کا آغاز ہوگا۔
اس درمیان ترنمول کانگریس لیڈر وجئے اپادھیائے نے میڈیا کو دیے گئے بیان میں کہا ہے کہ ’’ممتا بنرجی چوتھی بار وزیر اعلیٰ بننے جا رہی ہیں۔ وہ انڈیا اتحاد کی لیڈر کی شکل میں ابھریں گی۔‘‘
