مغربی بنگال اسمبلی انتخاب: 142 نشستوں پر ووٹنگ شروع، 1,448 امیدواروں کی قسمت کا فیصلہ

بارا نگر کے وارڈ نمبر 72 میں ای وی ایم میں خرابی کی وجہ سے روک دی گئی ووٹنگ

مغربی بنگال میں دوسرے مرحلے کی ووٹنگ جاری ہے۔ بارا نگر کے وارڈ نمبر 72 میں ای وی ایم میں خرابی کی وجہ سے ووٹنگ روک دی گئی ہے۔ ناراض ووٹرس کا الزام ہے کہ مشین کو 5 بار بدلا گیا، لیکن پھر بھی ووٹنگ کا عمل شروع نہیں ہو سکا۔

ایک ووٹر متھو گرائی نے کہا کہ ’’ہم صبح 7 بجے سے لائن میں کھڑے ہیں۔ وہ کہہ رہے ہیں کہ ای وی ایم خراب ہو گئی ہے۔ اب ہم واپس جا رہے ہیں۔‘‘

چوتھی بار حکومت بنانے جا رہی ہے ٹی ایم سی: ابھیشیک بنرجی

ممتا بنرجی اور ابھیشیک بنرجی نے بنگال انتخابات میں بی جے پی پر مرکزی افواج کی ضرورت سے زیادہ تعیناتی کا الزام لگایا ہے۔ اب ابھیشیک بنرجی نے کہا ہے کہ ’آئی این ایس‘ کے جنگی جہاز اور رافیل طیارے، جنہیں تعینات کرنا باقی ہے، آپ وہ بھی کر دیں؛ جو کچھ بھی آپ کو بنگلہ دیش اور پاکستان کے خلاف کرنا ہے، وہ آپ بنگال کے لوگوں کے خلاف کر رہے ہیں۔ا

انہوں نے یہ بھی دعویٰ کیا ہے کہ بنگال میں 30 لاکھ ووٹرس کو ووٹ ڈالنے سے روکا گیا ہے۔ انہوں نے اپنی ایک سال پرانی پیشگوئی کو دوہراتے ہوئے کہا کہ ٹی ایم سی 2021 سے بھی زیادہ اکثریت حاصل کرے گی۔ ٹی ایم سی چوتھی بار حکومت بنا رہی ہے۔ میں آپ سے 4 مئی کو ملوں گا۔

بھبانی پور: ممتا بنرجی کے پولنگ اسٹیشن کے باہر پہنچے سویندو ادھیکاری

ممتا بنرجی نے صبح سے ہی اپنے انتخابی حلقہ بھبانی پور میں ڈیرے ڈال رکھے ہیں۔ انہوں نے بی جے پی پر انتخابی عمل میں مداخلت اور گڑبڑ کرنے کا الزام لگایا ہے۔ اسی دوران بی جے پی لیڈر سویندو ادھیکاری بھی بھبانی پور پہنچ گئے ہیں۔ بتایا جا رہا ہے کہ بی جے پی لیڈر اسی پولنگ اسٹیشن کے باہر موجود ہیں جہاں ممتا بنرجی صبح سے موجود ہیں۔

بنگال میں صبح 9 بجے تک 18.39 فیصد ووٹنگ ہوئی۔

بنگال میں لوگوں نے ووٹنگ کے عمل میں بڑھ چڑھ کر حصہ لیا ہے۔ صبح 9 بجے تک 18.39 فیصد ووٹ ہو چکی ہے۔

بی جے پی انتخابات میں زبردستی دھاندلی کرنا چاہتی ہے: ممتا بنرجی

ممتا بنرجی نے مغربی بنگال میں دوسرے مرحلے کی پولنگ کے دوران تشدد کا الزام لگایا۔ انہوں نے کہا کہ بی جے پی زبردستی انتخابی دھاندلی کرنا چاہتی ہے۔

مغربی بنگال کے رائے دہندگان کو بے خوف ہوکر ترقی پسند اقدار کو ووٹ دینا چاہئے: کھڑگے۔

کانگریس صدر ملکارجن کھڑگے نے مغربی بنگال اسمبلی انتخابات کے دوسرے اور آخری مرحلے کی پولنگ شروع ہونے کے بعد بدھ کو ریاست کے رائے دہندگان سے اپیل کی کہ وہ بلا خوف و خطر اپنے حقِ رائے دہی کا استعمال کریں اور ترقی پسند اقدار اور ترقی کے حق میں ووٹ دیں۔